Responsable deth tractament

Quin ei eth tòn ròtle en tractament de donades?

En un tractament de donades personaus, pòdes assumir diferenti ròtles en foncion deth tòn ròtle. En tot depéner d’aguest ròtle, es tues obligacions per çò qu'ei deth tractament seràn diferentes:

• Era figura deth responsable deth tractament: Concrètament, pòdes agir coma responsable deth tractament se tu ès qui determine entà qué e coma se tracten aguestes donades personaus, ei a díder, era finalitat e es mejans deth tractament. Tanben pòdes èster corresponsable deth tractament, s'era decision dera finalitat e es mejans ei compartida damb mès organizacions.
• Era figura der encargat deth tractament: Per contra, seràs encargat deth tractament se quauquarrés aute t’encargue un servici o projècte qu'implique tractar donades personaus (rends servici a compde deth responsable deth tractament). Tanben pòdes èster sosencargat deth tractament, se tractes es donades per encomana der encargat.
• Era figura deth delegat de proteccion de donades: Era figura deth delegat de proteccion de donades (DPD) ei clau ara ora de velhar peth compliment dera normativa de proteccion de donades enes organizacions, assessorar es entitats que tracten es donades e hèr de pònt damb era APDCAT o era autoritat de contraròtle competenta en cada cas. Pòt hèr part deth personau dera entitat responsabla o encargada de tractar es donades o ben agir en encastre d’un contracte de servicis. Eth DPD aurà d’informar e assessorar ara direccion e ath personau dera tua organizacion sus es obligacions qu'impause era normativa de proteccion de donades. Tanben supervisarà que complisses era normativa, t’assessorarà per çò qu'ei dera avaloracion d’impacte relativa ara proteccion de donades e cooperarà damb era APDCAT o era autoritat de contraròtle que correspone, per çò qu'agís de punt de contacte entà ahèrs relatius as tractaments de donades.