Contacte
As dret a qu’era entitat que vò tractar es tues donades t’informe sus ua seguida de qüestions relatives ath tractament.
Quan es donades les as facilitades tu dirèctament
En aguest cas, t’an d’informar sus:
- Era identitat e es donades de contacte dera entitat responsabla deth tractament des donades e, s’esquè, deth sòn representant.
- Donades de contacte dera persona delegada de proteccion de donades, s’esquè.
- Finalitats deth tractament a que se destinen es tues donades e era basa juridica entà amiar-lo a tèrme. S'era basa juridica ei er interès legitim, cau concretar-lo.
- Destinataris o categories de destinataris des donades (tresaus as quaus comuniquen es tues donades), s’esquè.
- Era intencion de transferir es donades a un tresau país o a ua organizacion internacionau e era basa entà hè'c, s’esquè.
- Tèrme pendent eth quau se conservaràn es donades, o es critèris entà determinar-lo.
- Eth dret a sollicitar er accès as tues donades, era rectificacion o era supression des donades, era limitacion deth tractament, era oposicion ath tractament e era portabilitat des donades.
- Quan eth tractament se base en consentiment, eth dret a retirar-lo en quinsevolh moment.
- Eth dret a presentar ua reclamacion deuant ua autoritat de contraròtle.
- Se recuelhen es tues donades coma requisit legau o per obligacions contractuaus o coma un requisit de besonh entà soscríuer un contracte, e s'ès obligat a facilitar-les e sus es conseqüéncies de non hè'c.
- Era existéncia de decisions automatizades, includida era elaboracion de perfils, e era informacion sus era logica aplicada e es sues conseqüéncies.
Se tu non as facilitat es donades
Ath delà des qüestions anteriors, s'an obtengut es donades per auti mejans, t’an d’informar de:
- Es categories de donades personaus que se tracten.
- Era hònt dera quau procedissen es donades e, s’esquè, se provien de hònts d’accès public.
Informacion clara e concisa
Era informacion a d'èster concisa, transparenta, comprenedera e de facil accès, damb un lenguatge clar e simple, mès que mès quan era informacion s’adrece a menors. S’an d’evitar es formules enrambolhades e damb remandaments a tèxtes legaus. Tanben cau que te la faciliten per escrit o per auti mejans, includidi es electronics.
Tèrme entà informar deth tractament
En cas qu'era informacion non l’ages facilitada tu dirèctament, era entitat que tracte es tues donades t’a d’informar sus eth tractament:
- Laguens deth tèrme maximau d’un mes dempús que s’an obtengut es donades.
- Ena prumèra comunicacion damb tu, s'es donades s’an recuelhut damb aguesta finalitat.
- Ena prumèra comunicacion des donades a un aute destinatari, s'aguesta comunicacion ei prevista.
Quan non cau que t’informen
Non cau qu’era entitat t’informe deth tractament se ja n’as estat informat prealablament. S'es donades non provien de tu dirèctament, era entitat non t’a d’informar enes casi següenti:
- S'ei impossible o supause un esfòrç desproporcionat (en particular, en cas de tractaments damb finalitats d’archiu o estadistics o d’investigacion scientifica o istorica), o impossibilite o empache grèvament es objectius deth tractament.
- Se i a ua prevision legau exprimida deth tractament.
- Se i a ua obligacion de secrèt legau o professionau.