Aplicar es principis de proteccion de donades

Quan tractaràs donades personaus, te cau respectar uns principis basics que detalhe era normativa. Concrètament, es principis que recuelh era normativa de proteccion de donades e que cau aplicar son:

• Licitud, leiautat e transparéncia en relacion damb era persona titulara des donades. Cau compdar damb ua basa juridica entà tractar es donades, que pòt èster eth consentiment o un aute supausat. Cau informar era persona titulara des donades de quines donades se tracten, entà qué, pendent guaire de temps, etc.
• Limitacion dera finalitat: es donades s’an de recuélher damb finalitats determinades, explicites e legitimes e posteriorament non s’an de tractar de manèra incompatibla damb aguestes finalitats.
• Minimizacion: es donades an d'èster apropriades, avientes e limitades a çò qu'ei de besonh en relacion damb es finalitats entàs quaus se tracten.
• Exactitud: es donades an d’èster exactes e, se cau, s’an d’actualizar.
• Limitacion deth tèrme de conservacion: s’an de conservar de sòrta que permeten identificar es persones pendent un periòde non superior ath de besonh entàs finalitats deth tractament de donades personaus.
• Integritat e confidencialitat: s’an de tractar en tot garentir ua seguretat adequada.

Ua des principaus innovacions introdusides per RGPD ei era regulacion deth principi de responsabilitat proactiva. Er RGPD lo descriu coma eth besonh que s’apliquen mesures tecniques e organizatives apropriades, damb era tòca de gaentir e poder demostrar qu'eth tractament ei acordat ath Reglament.

En tèrmes practics, aguest principi requerís qu'es organizacions analisen quines donades tracten, damb quines finalitats ac hèn e quin tipe d’operacions de tractament amien a tèrme. A compdar d’aguesta coneishença, an de determinar de manèra explicita coma aplicaràn es mesures que preve er RGPD. Egaument, s’an d’assegurar qu'aguestes mesures son es adequades entà complir-lo e que pòden demostrar-ne eth compliment deuant des persones interessades e deuant des autoritats de contraròtle, coma era APDCAT. 

En sintèsi, aguest principi exigís qu'es organizacions agen ua actitud conscienta, diligenta e proactiva deuant toti es tractaments de donades personaus qu'amien a tèrme.