Identificar era basa juridica que permete eth tractament

Supausats

Entà complir damb un des principis de proteccion de donades, eth de licitud deth tractament, cau compdar damb ua basa juridica entà poder tractar es donades personaus. Atau, solament poderàs tractar-les se se da quauqu'un des supausats següenti:

• Consentiment: compdar damb eth consentiment dera persona titulara des donades. A d'èster valid: indobtable, especific, informat e liure.
• Contracte: qu'eth tractament de donades sigue de besonh entà executar un contracte qu'era persona titulara des donades n’ei part o entà aplicar mesures precontractuaus a peticion d’era.
• Obligacion legau deth responsable: qu'eth tractament sigue de besonh entà complir ua obligacion legau dera entitat responsabla deth tractament.
• Interèssi vitaus: que sigue de besonh entà protegir interèssi vitaus dera persona titulara des donades o d’ua auta persona.
• Mission d’interès public: que sigue de besonh entà complir ua mission realizada en interès public o en exercici de poders publics autrejadi ara entitat responsabla deth tractament.
• Interèssi legitims deth responsable: que sigue de besonh entà satisfèr interèssi legitims perseguidi pera entitat responsabla deth tractament o per un tresau. Se poderà emplegar aguesta basa juridica entà tractar es donades cada viatge que non prevalguen interèssi o drets e libertats fondamentaus dera persona titulara des donades que requerisquen era proteccion de donades personaus, en particular quan sigue menor. Cau apuntar qu'aguesta basa juridica non se pòt aplicar en tractaments efectuadi pes autoritats publiques en exercici des sues foncions.

E se son categories especiaus de donades?

S'eth tractament afècte categories especiaus de donades, que hèn referéncia a donades especiaument protegides relatives ara salut o era vida sexuau, era ideologia, es opinions politiques, etc., ath delà d'auer de besonh ua basa juridica des regulades en RGPD, cau que se dongue bèth un des supausats següenti:

• Consentiment: eth tractament s’efectue damb eth consentiment explicit dera persona titulara des donades, exceptat qu'eth dret dera UE o der estat membre non ac permete.
• Obligacions o drets laboraus: eth tractament ei de besonh entà complir obligacions o exercir drets en encastre laborau, s'atau ac autorize eth dret dera UE o der estat membre, o un convengut collectiu.
• Interèssi vitaus: eth tractament ei de besonh entà protegir interèssi vitaus dera persona titulara des donades o d’un tresau, s'era persona interessada non a capacitat entà consentí'c.
• Entitats sense tòca lucrativa: eth tractament s’efectue en encastre des activitats legitimes d’ua entitat sense tòca lucrativa damb finalitat politica, filosofica, religiosa o sindicau e se referís as membres actuaus o ancians dera entitat, o a persones que mantien contactes regulars damb era entitat en relacion damb es sues finalitats.
• Donades ja publicades: eth tractament se referís a donades qu'era persona titulara a hèt manifèstament publiques.
• Reclamacions: eth tractament ei de besonh entà formular, exercir o deféner reclamacions o quan es tribunaus agissen en exercici dera sua foncion judiciària.
• Interès public: eth tractament ei de besonh per rasons d’interès public essenciau, en basa ath Dret dera UE o der estat membre.
• Encastre sanitari: eth tractament ei de besonh entà finalitats de medecina preventiva e deth trabalh, diagnostic medicau e rendement e gestion d’assisténcia sanitària, cada viatge qu'eth tractament sigue hèt per professionaus sanitaris assubjectits a secrèt professionau o ua auta persona assubjectida ath déuer de confidencialitat.
• Salut publica: eth tractament ei de besonh per rasons d’interès public en encastre dera salut publica, en basa ath Dret dera UE o der estat membre.
• Archiu, investigacion scientifica o istorica, o finalitats estadistiques: eth tractament ei de besonh entà finalitats d’archiu en interès public, d’investigacion scientifica o istorica o finalitats estadistiques, en basa ath Dret dera UE o der estat membre.

Cau ahíger qu'es donades personaus relatives a condemnes e infraccions penaus, encara que non se considèren categories especiaus de donades, solament se pòden tractar jos era supervision des autoritats publiques o quan ac autorize eth dret dera UE o der estat membre, qu'a d’establir gerentides adequades entàs drets e libertats des persones titulares des donades.

Bremba-te, qu'er RGPD a introdusit naues categories especiaus de donades. A compdar des donades especiaument protegides que ja prevedie era LOPD, qu'ara se nomenten “categories especiaus de donades”, eth Reglament n’includís dues de naues: 

• Donades genetiques: donades personaus relatives as caracteristiques genetiques eretades o aquerides d’ua persona fisica, que proporcionen ua informacion unica sus era fisiologia o era salut d’aguesta persona, obtengudes en particular dera analisi d’ua mòstra biologica. 

• Donades biometriques: donades personaus obtengudes a compdar d’un tractament tecnic especific, relatives as caracteristiques fisiques, fisiologiques o conductuaus d’ua persona fisica, que permeten o confirmen era identificacion unica d’aguesta persona (imatges faciaus, donades dactiloscopiques, etc.).

Tractaments basadi en consentiment

Quan era basa juridica deth tractament sigue eth consentiment, er RGPD requerís qu'era persona interessada lo realize mejançant ua declaracion indobtabla o ua accion afirmativa clara. As efèctes deth Reglament, es casetons ja mercadi, eth consentiment tacit o era inaccion non constituïssen un consentiment valid.

• Qué succedís damb es tractaments que s’efectuen sus era basa deth consentiment per omission?

Aguestes formes de consentiment non son compatibles damb er RGPD, per çò que se basen ena inaccion dera persona interessada. Er RGPD tanben indique qu'es tractaments basadi en consentiment iniciat abans dera aplicacion deth Reglament contunharàn d'èster legitims, cada viatge qu'aguest consentiment s’auesse rendut dera manèra que preve eth madeish RGPD, ei a díder mejançant ua manifestacion o accion afirmativa.

• En quines situacions cau qu'eth consentiment sigue explicit?

Er RGPD preve bères situacions enes quau eth consentiment a d'èster explicit. Aguesta garentida addicionau afècte es casi següenti:

1. Tractament de categories especiaus de donades
2. Adopcion de decisions automatizades
3. Transferiments internacionaus

Encara qu'es diferéncies entre eth consentiment indubitable, tau coma lo definís er RGPD, e eth consentiment explicit pòden semblar malaisits de distinguir, i a situacions en qu'eth consentiment pòt èster indubitable e autrejar-se de forma implicita. 

• Consentiment des menors

D’acòrd damb era Lei organica de proteccion de donades personaus e garentida de drets digitaus (LOPDGDD), es menors poderàn consentir eth tractament des sues donades personaus a compdar des 14 ans, exceptat qu'ua normativa damb reng de lei exigisque era assisténcia des titulars dera potestat pairau o tutoratge. En cas des menors de 14 ans, serà de besonh eth consentiment des titulars dera poder pairau o tutoratge.

Ath delà, eth lenguatge utilizat entà informar-les a d'èster especiaument compreneder en cas de menors.